Paulinus Aquileiensis: Carmina

Pag 128


9. Inter has quoque pennas gerens plumbeas
Inanis cursim transuolauit Gloria,
que me uentosa nitebatur subito
fraude perire.
10. Kanendo uenit fistula Ingluuies,
bona presentis irrogabat temporis,
extendit uentrem, temulentum reddidit,
miscuit risus.
11. Lugere modo me permitte, domine,
mala que gessi, reus ab infantia,
lacrimas michi tua dona gratia
cordis ab imo.
12. Meis, ut puto, uiciis tartarea
tormenta multis non ualent sufficere,
nisi succurrat, Christe, tua pietas
misero michi.
13. Nullum peccatum super terrae faciem
potest aut scelus inueniri quodpiam,
a quorum non sim inquinatus fecibus
infelix ego.
14. Ortus, occasus, aquilo, septentrion,
caelum, terraque, mare, fontes, flumina,
montes et colles, campi, mixta rosulis
lilia, flete!
15. Plangite mecum, astra rutilantia,
mecum mugite, bestiae siluicole,
dicite: “Tu es miser, qui sub impio
crimine gemis!”

Torna all'inizio