qui erant super ea. Et ipsi Brixienses suspenderunt captos imperatoris
per brachia extra palancatum civitatis. Nec imperator
cum exercitu suo potuit habere dictam Brixiam civitatem, quia
bene se defendit a predicta obsidione; et ita imperator recessit
confusus cum omnibus amicis suis, qui erant secum in dicto
exercitu.
INCIPIT LIBER DE PRELATO
QUEM FECI OCCASIONE FRATRIS HELYE
ET MULTA BONA ET UTILIA CONTINET
ET DURAT USQUE AD ILLUM LOCUM UBI SCRIBITUR
«ANNO DOMINI MCCXXXIX, INDICTIONE XII»
Item in supra dicto millesimo, scilicet CCXXXVIII, indictione
XI, intravi Ordinem fratrum Minorum ego frater Salimbene
de Adam ex civitate Parmensi quarta die intrante Februario,
in festo sancti Giliberti, receptus sero vigilie sancte Agathe
in civitate Parmensi a fratre Helya generali ministro. Ibat enim
Cremonam, ad imperatorem missus a domino papa Gregorio nono,
cum esset specialis amicus utriusque. Et ita conveniens erat
mediator. Nam, testante beato Gregorio, «cum is qui displicet
ad interpellandum mittitur, irati animus ad deteriora provocatur».
Et erat ibi frater Ghirardus de Mutina cum receptus fui,
qui etiam rogavit pro me ut reciperer, et exauditus fuit.
Et dominus Ghirardus de Corigia, qui dicebatur de Dentibus
eo quod magnos dentes haberet, tunc temporis potestas Parmensium
erat, et venit personaliter cum quibusdam militibus ad locum
fratrum Minorum ad visitandum fratrem Helyam generalem ministrum.
Qui sedebat in domo in qua hospites sive forenses comedunt,
super lectum de culcidra, et habebat ignem copiosum coram se
et capellam Armenicam in capite suo; nec potestati intranti et
se salutanti assurrexit nec de loco suo motus est, ut vidi oculis
meis; que fuit rusticitas maxima reputata, cum dicat ipse Deus
in divina Scriptura, Levitici XIX: Coram cano capite consurge
et honora personam senis. Item Eccli. III: Quanto magnus es,
humilia te in omnibus, et coram Deo invenies gratiam. Item Apostolus
|
|