DOMNO GLORIOSO FILIO KAROLO DUCI GREGORIUS PAPA.
Comperientes te, in Christo, dilectissime, religiosae mentis affectum gerere in
multis oportunitatibus, debito salutis praemisso, notum facimus Deo dilectae tuae
dignitati, praesentem fratrem Bonifacium – fide et moribus approbatum, a nobis episcopum
consecratum atque institutionibus sanctae sedis apostolicae, cui Deo auctore
praesidemus, aecclesiae generali sollicitudine, informatum – ad praedicandum plebibus
Germaniae gentis ac diversis in orientali Reni fluminis parte consistentibus, gentilitatis
errore detentis vel adhuc ignorantiae obscuritatibus praepeditis, necessario destinare.
Pro quibus eum gloriosae benivolentiae tuae omnimodo commendamus, ut eum
in omnibus necessitatibus adiuvetis et contra quoslibet adversarios, quibus in Domino
praevaletis, instantissime defendatis, certissime retinentes, Deo vos exhibere, quaecunque
huic promptissimo impenderitis favore; qui, sanctis apostolis suis ad lucem
gentium destinatis, suscipientibus eos se suscipiendum praedixit. Quorum institutionibus
per nos informatus, praemissus antistes in sorte praedicationis procedit.
---------------------------------------------------------------------------------------------------------
GREGORIUS PAPA UNIVERSO POPULO PROVINCIAE ALTSAXONUM.
“Sapientibus et insipientibus debitor sum”, fateor, karissimi, “volens vos scire,
qualem sollicitudinem habeam pro vobis” – et pro his, qui verbum exhortationis fidei
Iesu Christi domini nostri susceperunt et qui adhuc suscepturi sunt –, “ut consolentur
corda vestra instructa in caritate et in omnes divitias plenitudinis intellectus,
in agnitionem mysterii Dei patris Iesu Christi”, ut ait egregius apostolus, “in quo sunt
omnes thesauri sapientiae et scientiae absconditi. Hoc autem dico, quoniam prope
est regnum Dei, ut nemo vos amplius decipiat in sublimitate sermonum”, ut in quocumque
metallo salutem vestram quaeratis, adorantes idola manu facta, aurea, argentea,
aerea, lapidea vel de quacumque materia facta. Qui falsidica numina a paganis antiquitus
quasi dii vocati sunt, in quibus demones habitare noscuntur; “quoniam omnes
|
|