Salimbene de Adam: Cronica

Pag 677


ultra Taleatam. Et eodem anno intravit domnus Gregorius
de Bonicis in monasterium sancti Prosperi de Regio abbas; et
civitas fuit absoluta, que steterat interdicta per sex annos et
excommunicata.
De doctrina abbatis Ioachym, que hoc anno inchoari debebat, et qualiter
Ioachite eam inchoatam fore testantur in verberatorum devotione.
Et eodem anno debebat inchoari doctrina Ioachim abbatis, qui
dividit mundum in triplicem statum. Nam in primo statu seculi
proprietate misterii operatus est Pater in patriarchis et filiis prophetarum,
quamquam indivisibilia sint opera Trinitatis. In secundo
statu operatus est Filius in apostolis et apostolicis viris. De
quo ait Filius in Evangelio Io., V: Pater meus usque modo operatur,
et ego operor. In tertio statu operabitur Spiritus Sanctus in religiosis.
Ita scribit abbas Ioachym, qui fuit de Ordine Floris. Quem
statum inchoatum dicunt in illa verberatione, que facta est
MCCLX, indictione III, quando qui verberabant se clamabant
Dei voces et non hominis.
De prelio quod inter regem Hungárie et regem Boemie hoc millesimo factum
fuit, scilicet MCCLX.
Eodem anno rex Hungárie pro terris regem Boemie bello agreditur,
habens in exercitu suo diversarum orientalium nationum
et paganorum CCXL milia equitum. Cui rex Boemie cum CM
equitum, inter quos dicitur habuisse VII milia equorum ferro
coopertorum, ad resistendum occurrit. Cumque in confiniis regnorum
bellum inchoatum fuisset, ex collisione equorum et armorum
tantus pulvis de terra surrexit, ut media et clara die vix homo
hominem cognoscere potuisset. Tandem Húngari, rege eorum
graviter vulnerato, terga vertentes et cedentes festinaverunt
effugere; et in quodam fluvio profundissimo, quem transire debuerant,
preter alios occisos circa XIIII milia hominum submersa

Torna all'inizio