Ea propter vestram socialem amiciciam in quantum
possumus deprecamur, quatinus de vestrarum personarum
statu et disposicione rerum nos certificare curetis, et quam
cicius potestis festinetis redire, sine dubio scientes quod
piper cinamomum et omnia genera specierum carissima
sunt in parte occidentis.
Responsiva cum excusacione.
Iam biennium est elapsum quod propter obsidionem
Damiate soldanus Babilonie de Alexandria non permisit
egredi christianos. set iam promisit quod octavo idus
aprilis nos et alios cum omnibus mercimoniis redire permittet
et tunc auxiliante domino collabimus et revertemur
cum numerosa et copiosa multitudine specierum.
Preterea noveritis, quod sani sumus, set non alacres,
quia dilectissimus socius noster A quasi per unius anni
spatium valida egritudine laboravit, et ita demum obiit
in kalendis augusti Alexandrie, ubi congregatis hominibus
christianis corpus eius in cimiterio beati Marchi sepelivimus cum honore.
Verum tamen omnis amaritudo nostra in dulcedinem
est conversa, ex quo certi sumus quod egrediemur de domo
Pharaonis.
Notula qua doctrina datur quod epistole mercatorum
debent simplici stilo componi.
Mercatores in suis epistolis verborum ornatum non
requirunt, quia fere omnes et singuli per idiomata propria
seu vulgaria vel per corruptum latinum ad invicem
sibi scribunt et rescribunt, intimando sua negocia et
cunctos rerum eventus.
8. Aus dem titel de depositis.
Quot modis fiunt deposita.
Quidam sua deponunt apud religiosas personas, alii
deponunt apud aliquos laicos qui boni esse creduntur, alii
apud hospites quorum noticiam habent vel cum quibus sunt
casualiter hospitati, alii apud mercatores vel campsores.
Item quidam deponunt tantum ad custodiam, alii ad
custodiam et causa lucri, et alii causa timoris.
De signis depositorum.
Quidam tempore deposicionis faciunt fieri publica
instrumenta.
|
|