... episcopo Suessano … papa, per Stephanum.
Firmam gerimus in mente fiduciam, quod preces nostras reverenter excipias
et eas reverentius ad gratiam exauditionis admittas, illas maxime, quas
pro illis personis porrigere nos contingit, quas nobis idemptitas sanguinis
caras reddit et obsequiorum longa grataque prestatio facit acceptas. Cum
igitur dilecto filio … nepoti nostro, qui diu nobis servivit fideliter et
devote, cuiusque vitam, mores et actus laudabiles familiariter longo tempore
sumus experti, de canonicatu et prebenda, per mortem quondam …,
qui apud apostolicam sedem decessit, in Ecclesia tua vacantibus, sub certa
verborum forma per nostras duxerimus litteras providendum, … et … sibi
super hoc a nobis executoribus deputatis, fraternitatem tuam requirimus et
rogamus attente, per apostolica scripta mandantes, quatenus, ob reverentiam
apostolice sedis et nostram, … procuratori dicti nepotis nostri favorabilis
et benignus assistas desque opem et operam efficaces, quod huiusmodi
nostra provisio circa eiusdem nepotis nostri personam optatum sortiatur
effectum et omnis impedimenti obstaculum tui oportuni favoris suffragio
penitus excludatur, ita quod per tue cooperationis ministerium, apud nos
apostolici tibi favoris vendices gratiam et securius pro tuis et ecclesie tue
commissis negotiis ingruente necessitatis tempore recurrere ad nos possis et
apostolicum confidentius implorare favorem. Et ut precum nostrarum primitias
in hac parte de archivo pectoris nostri prodire cognoscas, ipsarum
baiulas presentes iussimus sub bulle nostre munimine roborari.
|
|