Cap. LXXVII.
Rex Conradus significat adventum suum de
Alamannia in regnum cuidam Magnati.
Volentes devotionem tuam felicibus nostrae
Majestatis recreare processibus, fidelitati
tuae duximus ad gaudium intimandum,
quod de negotiis omnibus in partibus Alamanniae
et subsequenter in Lombardia, pro voto
dispositis, et ad honorem culminis nostri salubriter
ordinatis, die lunae quarto instantis
mensis Decembris gressus nostros feliciter de
Verona moventes, apud Lugnaniam die ipso
venimus pernoctare; sequenti die Martis Vicentiam
accedentes; et exinde versus portum
Pisanii continuatis processuri dietis, die lunae
11. Mensis ejusdem felici agmine galeas intrabimus
in haereditarium regnum nostrum Siciliae
evestigio accessuri. Ubi applicantes Deo duce
salubriter, quam jam per praecedentes indiximus
Excellentiae nostrae literas, in festo Nativitatis
Dominicae proximo veniente, pro reformatione
ipsius provinciae, et fidelium nostrorum
statu salubri, apud Foggiam tenere proposuimus
Curiam generalem. Quare fidelitatem
tuam hortamur attentius et mandamus, quatenus
felicium successuum nostrorum votiva recreatione
laetatus, circa Majestatis nostrae negocia
vel servitia more solito, sic laudabiliter et
strenue ac devote te geras, ut in conspectu nostri
culminis gratiosus appareas, et commendabilis
praesenteris. Nos enim alta mente concepimus,