e. Conmissio super recepcione et examinacione testium.
Frater I etc. dilecto in Christo filio etc.
Cum in causa que inter P actorem ex una parte et R
reum super quadam re . . vertitur coram nobis testes sint
necessario producendi, discrecioni vestre tenore presencium
de utriusque partis assensu conmittimus et mandamus,
quatenus testes omnes quos ipse partes producere voluerint
coram vobis super articulis ab utraque parte datis
cum interrogatoriis ab ipsis exhibitis, que omnia sub sigillo
nostro vobis mittimus presentibus interclusa, infra annum
— sive unum mensem — a recepcione presencium, quem
terminum ipsis partibus ad probandum peremptorium duximus
assignandum, prudenter recipere ac diligenter examinare
curetis, deposiciones omnium testium quos produxerint
fideliter in scriptis redactas una cum predictis articulis et
interrogatoriis ac tenore presencium sub sigillo vestro clausas
necnon revelatas ad nos quam cicius poteritis transmittentes,
prefixo partibus peremptorio termino conpetenti
quo sufficienter cum omnibus instrumentis actis et munimentis
suis causam ipsam qualitercumque tangentibus conpareant
coram nobis, in dicta causa prout de iure fuerit
processure legittime.
Testes autem qui fuerint nominati, si se gracia odio
vel timore subtraxerint, per censuram ecclesiasticam conpellatis
veritati testimonium perhibere.
Datum etc.
G.
Lite contestata, et iuramento de calumpnia prestito,
sequitur prefixio termini ad ponendum.
a. Prefixio termini ad ponendum.
Coram reverendo patre domino archyepiscopo suprascripto
conparentibus in iudicio P actore et R reo predictis,
idem dominus archyepiscopus utrique parti ad
ponendum hinc inde quidquid ponere volunt diem lune
proxime venientem pro primo termino assignavit.
|
|