[20.] Eodem tempore archiepiscopus Modoetie degens graviter
infirmatur. Cumque egrotaret ad mortem, disposita
domo ac bonis omnibus defferri se iubet ad urbem. Ubi
cum aliquantis langueret diebus, vite presenti subtrahitur,
sepultus est autem ad Sanctum Dionisium, ubi elegans fundaverat
ipse monasterium. Providit etiam vivens universis
ecclesie ordinibus plures conferens facultates ad presentium
futurorumque subsidia. Huius in diebus cuidam Genuensis
urbis incole revelate sunt Iohannis archiepiscopi sacrosancte
reliquie. De eo cum sufficienter sit dictum, cesset amodo
noster ab illo stilus, cote iam tertia subtiliter accuendus.
|
|