Pag 20

potentem. Cuius preceptis protinus obsequentes, elegerunt comitem Vielmum de Logolandia
in regem et futurum imperatorem, virum utique probum et exercitiis militaribus decoratum.
QUALITER LUDOVICUS REX FRANCORUM MARE TRANSIVIT ET OBTINUIT DAMIATAM. -
Anno Domini 1249 Ludovicus rex Francorum cruce signatus transivit in subsidium Terre sancte,
et cum magno exercitu et infinita navium multitudine intravit terram Egipti. Cuius fortitudine
perterriti Egiptii Damiatam, que in prophetis Menphis vocatur, protinus reliquerunt,
et rex tali modo eam habuit sine gladio et sagitta.
Eodem anno in principio iunii bellicosus rex Enricus filius Federici captus est a Bononiensibus
cum militia copiosa. Qua propter Bononienses sunt usque ad sidera elevati. Unde
Mutinenses necessitate compulsi se Bononiensium dominio subdiderunt.
In istis diebus tres filii Iacobi Delesmanino sunt capti ab Ecelino et variis tormentis
afflicti; tandem iussu ipsius Ecelini in platea Padue sunt crudeliter trucidati.
Eodem anno Federicus castrum Montis Silicis circa festum beati Iohannis Baptiste tradidit
Ecelino. Decimo vero die exeunte septembri burgus estensis traditus est ei per quendam
sceleratum virum et a Deo maledictum nomine Vitalianum de Arelda. Arcem autem
post mensem obtinuit, eam prius cum multis machinis expugnando. Tandem propter famem
omnia castra obtinuit Marchionis.
QUALITER REX FRANCORUM DAMIATAM RLDDIDIT SARACENIS. - Anno Domini 1250, circa
festum pasce cum Ludovicus rex Francorum versus Babilionam properaret, a Saracenis cum
suo exercitu est conclusus, et cum neque procedere, neque redire valeret, Soldano se tradidit
Babilonis, amisso prius in bello comite Roberto fratre suo cum maxima militum quantitate.
Rex itaque pro redemptione sua Damiatam tradidit Saracenis dimissisque ab eis redidit in
Siriam et reedificata Cesarea Palestine, in Franciam est reversus, cum ignominia sue gentis
tociusque populi Christiani. Saraceni considerantes tam preterita quam futura, Damiatam a
fundamentis protinus everterunt ne de cetero esset occasio et receptaculum preliorum.
Eodem anno, in festo sancti Bartholomei, Guilielmus de Campo sancti Petri iussu Ecelini
fuit in platea Padue crudeliter interfectus.