O homo, carne labilis,
Mente racionabilis,
Pestis repelle titulos,
Quę condilat articulos.
In manibus te nocuit,
Nichil plus in te potuit
Auferens manus floridas
Et dedit lepra horridas.
Vade, lavare septies ,
Ut renovetur species,
Quam tulit Phylargiria
semper habens suspiria.
Cetera sunt in ordine
Cum mensura vel pondere,
Manus sentit interitum
Laboris tollens meritum.
Clarissimi sunt oculi
Ad discernendum providi,
Aures sine prurigine,
Lingua sine rubigine.
Os totum constat aureum
Pacis porrigens osculum,
Manus sunt in tristicia,
Quos torquet Avaricia.
O homo, mente nobilis,
Ne sis manu ignobilis,
Sed cum hac inmunditia
Absterge cuncta vicia.
Qui virtutum deliciis
fruitur pressis viciis,
Erit de sorte domini,
Non sequax Apopompei.
|
|