Super eodem populo Beneventano, per notarium Iohannem de Capua.
Rex regum altissimus, qui mundum perpetua ratione gubernat et dirigit,
solus in se fixus manens et stabilis, tempus, quod ab evo proposuit, sua
dispositione movet et variat, legesque mortalium renovatis vicibus subalternat,
huius fortis potentia montes excelsos humiliat et colles humiles erigit
in sublimi, huius sapientia summa simplicibus prestat scientiam et perficit
ex ore infantium laudem suam, huius supereffluens gratia manus laxas
corroborat et natos pro patribus filios renovellat, hec superni regis potentia
sapiens, sapientia prepotens et gratia gloriosa nos devotum intuens ecclesie
filium volensque nobiscum facere summum bonum, quamquam aliquantisper
non placidis lacessitum eventibus, votiva revexit ad gaudia defendensque
suam in nobis iustitiam fatigatam grati temporis serenitatem restituit et
nos in throno paterni solii collocavit. Ad exhilarationem igitur cordis vestri
ceterorumque nostrorum fidelium leta presens procedens epistula, themate
contexta iocundo, stilo significat gaudioso quod, repetentibus nobis nuper
sub augustis auspiciis partes Ytalie, alma mater occurrit ecclesia, cum votive
suavitate dulcedinis et quem regalem cognovit heredem ac filium regalibus
decrevit insignibus decorandum. Hoc namque in pentecosten festo videlicet,
quo sacri pneumatis gratia dignante discipulorum inflammavit corda
|
|