Nam si rex phylosophatur, quid est gloriosius?
Hoc fecit Iustinianus, hoc et Theodosius.
Id exsequere, quod constat auro preciosius.
Imperator HEINRICUS, pater tanti filii,
Sapienter rexit sceptrum summi domicilii
Septem artibus ornatus ad instar Pompilii.
Dignum est, ut tu patrisses in celsis honoribus,
Redde patri suam formam corde, manu, moribus.
Prestet deus, ut hoc agas in multis temporibus.
Quanta tibi facit deus, sis memor cottidie.
Te sequentibus appare ut sol in meridie,
Noctis speciem ostende filiis perfidię.
Legifer es dante deo in subiectis gentibus,
Equa lance pensa pondus parvis et potentibus;
Sic ius legis temperabis sub te quiescentibus.
Mercennarii mercedem lex iubet ne teneas.
Pro hac culpa cautus esto, rex bone, ne pereas;
Imple legem, non videbis phalanges funereas.
Si Benzoni, servo tuo, suum reddis meritum,
Evanescit velut fumus excursus proselitum.
Ad apostasiam versi ibunt in interitum.
Terga vertent universi spiritus silvatici,
Patarini et ambrones simul et artabati
Atque ligna colligentes sacro die sabbati.
|
|