de salubri regimine praecipua solicitudine cogitantes.
Et cum inter curas solicitudinis nostrae
revolvimus, qualiter per nos vobis posset
in ipso salubrius et cautius provideri, illud
tandem tenaci meditatione tanquam honorificentius
nobis et vobis duximus eligendum,
quod ad hoc vires et potentiam nostram vestris
profectibus strictius et peculiarius obligetis. Ad
quod, prout perspicaciter intueri potestis, nulla
nos inducit ambitio, quod curam regiminis
civitatis unius quantumcunque nobis sinceritate
experta fidelis assumere cupiamus, qui fere
totius orbis habenas universaliter moderamur:
sed ut affectionis nostrae zelum vobis singulariter
ostendamus, et ut ad considerationem
omnium manifestissime deducatur; quod dum
humeris nostris sarcinam regiminis vestri libenter
imponimus, regi vos provide ac salubriter
affectemus, ut sine culminis nostri laesione laedi
per aliquem non possitis.
Cap. LXXVI.
Communitati, quod parent nuncios mittendos
Cremonam, ubi intendit Curiam celebrare.
Qualiter jura Imperii pro varietate temporis
praecedentis conculcata jaceant et
depressa, qualiter ejus tranquillitas fuerit
olim et sit usque ad haec felicia nostra
tempora [quod anxie dicimus] perturbata, universi
de Imperio cujuscunque officii, vel conditionis