utillitas comunis exegerit emendentur ad presens tamen infrascripta
duximus ordinanda:
In primis igitur quia publice utille est ut delinquentium malefitia
puniantur, que ex eo quod rectores per nos deputati non possent
de excessibus perpetratis sine aliqua accusatione procedere,
contra commune utillitatem, iustitie debitum et nostre dignitatis
honorem remanent impunita, statuimus quod castellani nostri
Gaudiani et Ripperie possint per inquisitionis viam contra
quoscumque super omni malefitio ad eorum castellanorum seu
ipsorum curias notitiam qualitercumque pervenire in iurisdictionibus
sibi comissis procedere, diffinire et exequi, statuto de modo
procedendi in contrarium condito non obstante. Item quia secundum
iura comunia in curia prescidentis servari debent scripture publice,
iuditiaria acta in causis civillibus continentes, statuimus quod
nullus notarius in curiis dictorum castellanorum aliqua iudicii acta
conscribat, nisi in quaterno congruo, qui post recessum dictorum
castellanorum vel eorum vicariorum de locis tribunalibus Insule
Orte et Gaudiani penes ipsos castellanos vel eorum vicarios
conserventur. Quodque notarii acta huiusmodi conscribentes,
priusquam ad id adducantur, in manibus nostris iurent offitium
suum circha scripturas predictas fideliter exercere, quorum
notariorum nomina et iuramenta in libris eiusdem curie describantur.
Item quia miserabiles multe persone, propter nimiam questionum
prorogationem et timorem intollerabilis honeris expensarum que
frequenter summam sortis excedunt, iura sua vel minime
prosecuntur vel dimittuntur indeffensa, statuimus ut in causis
littigantium et maxime miserabilium personarum, asscendentibus
usque ad valorem librarum .X. imperialium vel abinde infra, per
eosdem castellanos vel eorum vicarios procedi possit summarie ac
sine strepitu et figura iuditii.
Item quod predicti castellani vel eorum vicarii non sint astricti a
statuto de questionibus comitendis, nisi prout eis videbitur expedire.
In quorum testimonium presentes fieri iussimus et sigilli nostri
munimine robborari. Datum in castro nostro Insule, die XVIII iunii
MCCCXLV, XIII. indictione.
|
|