pontificatus domni Marini summi pontificis secundi secundo in
sacratissima Sede beati Petri apostoli.
DIVERSAS quoque curtes, et hereditates monasterii huius cum
servis et ancillis in Calinolu, cum ecclesia Sancti Ylarii,
et Sancti Vincencii recollegit et consignavit pater venerabilis
Leo; et in Alarino similiter quedam recepit cum viridiario, quod
situm est sub ipso muro domnico, per hos fines: de duabus partibus
pergunt vie puplice; de tercia parte fine Larimberge, ancille
Dei; de quarta parte fine ipsa fontana puplica, cum omnia infra
se habente, et introito et exitu suo, in integrum; mulierem eciam
quandam, nomine Maia, cum filiis, filiabus, et cum inclitis generacionibus
suis: omnes servi et ancille sancti monasterii huius
Beati Vincencii martyris.
Magnus pater et abbas Leo, digne placens Deo, post multos
labores et magna certamina operum perfectorum, obiit quinto kalendas
octobris, anno Dominice incarnacionis .DCCCC°LXII°., indiccione
.IIII. . hoc tempore, consumatis Francorum regibus, ad
Teutonicos imperium convertitur. et primus ex Teutonicis dux
Saxonie Otto magnus suscepit imperium, atque Italiam ingressus,
de manu Iohannis pape duodecimi coronam suscipiens, augustus
procreatur.
|
|