Cap. LVI.
Mandat expresse cuidam nobili, quod veniat
ad eum, sicut alias multotiens sibi scripsit.
Satis potest tua devotio manifeste perpendere,
quod nisi praesentia tua foret nostris
instantibus servitiis plurimum opportuna,
Celsitudo nostra scripta tibi totiens non
utique direxisset. Cum igitur instantium negotiorum
qualitas hoc exposcat, fidelitati tuae iterato
firmiter et districte praecipiendo mandamus,
quatenus sicut felices processus nostros
diligis, et gratiam nostram charam habes,
statim receptis praesentibus, qualibet mora et
occasione cessantibus, ad personam nostram
festines venire, a facie nostra citius et hilaris
recessurus, etc.
Cap. LVII.
Communi Papiensium, ut non gravent concives
suos, existentes in servitiis Curiae.
Supplicavit Excellentiae nostrae R. de Papia,
fidelis noster, quod, cum ipse de mandato
nostri culminis speciali, in regimine
Parmensium, fidelium nostrorum, qui sunt
extra terminos Papiensium, pro nostris servitiis
existat ad praesens, secumque quosdam alios
Papienses, fideles nostros, sicut dicit, velut
necessarios officiales retineat in officio antedicto,
vobis mandare de nostra gratia dignaremur:
quod tam ipsum, quam praefatos ad dicta