d. Guilielminus de Paçis capitaneus partis Lanbertaciorum et sui milites et milites de Faventia,
et, incontinenti, prelium inceperunt cum ipso domino Malatesta et gente sua de Cesena, ita
et taliter quod ipse dominus Malatesta aufugit, cum multitudine gentis sue, versus Cesenam.
D. vero Galaottus de Lanbertinis de Bononia, qui tunc erat potestas Cesene, et d. Rodulfinus
de Ganaçese, cum multis aliis de Cesena, fugierunt, scanpantes in roccam dicti
castri Reversani; unde in continenti comune Forlivii, cum omnibus, qui ibidem erant cum
eo, circundantes ipsam roccham, ceperunt facere edificia et castellos de lignamine altos et
magnos ad preliandum ipsam roccham. Et sic illi, qui se reduxerunt in eadem, tractantes
conventionem et pactum, venerunt ad mandata comunis Forlivii, et ex illis, qui erant in
ipsa roccha, fuerunt capti XXV de melioribus et maioribus de Cesena, tam de militibus quam
de popularibus, inter quos fuerunt d. Galaottus de Lanbertinis potestas Cesene, d. Rodulfinus
de Ganaçese et unus ex filiis eius et gener eius, d. Guido de la Tunba et nepos
eius, et quidam alii, in quantitate XXV, capti fuerunt et ducti ad civitatem Forlivii, die martis
III septenbris. Alii vero omnes, qui erant in ipsa rocca ultra quam mille, relaxati fuerunt
de gratia speciali, et, cum eorum armis, remissi Cesenam, et hoc fuit die lune II septenbris;
ob quam causam incontinenti tractatus factus de concordia inter comune Forlivii et Cesenates,
et conpleta fuit concordia die mercurii tunc sequenti, et facti fuerunt potestates
Cesene dominus Argoglosius de Argoglosiis et Thedericus de Ordelaffis de Forlivio; et dominus
Raule de Maçolinis, cum omnibus amicis suis, qui steterant extra Cesenam, redierunt
in civitatem Cesene, et dominus Ranucinus Pocaterre, cum omnibus suis amicis, qui cum eo
steterant extra Cesenam.
Eodem vero anno, die lune ultima mensis septenbris, dominus Guilielminus de Paçis
capitaneus partis Lanbertaciorum de Bononia et suorum sequacium, cum militibus et peditibus
suis, et d. Maghinardus de Sosesana potestas Faventie, cum milicia et populo suo, equitaverunt
ad quoddam castrum vocatum Serravalle in Valdeseno, quod castrum erat Manfredi
de Manfredis de Faventia, et, per vim et prelium, ceperunt eundem, conburentes et devastantes
ipsum castrum, in quo erat magna multitudo bladi, quod fuit exportatum Faventiam;
aliud vero, quod portari non potuit, fuit igne crematum, et homines et res et bestie, que
invente fuerunt in ipso castro, fuerunt portate et ducti Faventiam.
Item, die iovis III mensis octubris, predicti domini, et milites et populares predicti Faventie
commorantes, equitaverunt in dictam contratam de Valdeseno, ad quedam castra et
fortilicias supra castrum Saxadelli, et ceperunt unum castrum nomine Saxum, et quandam
tunbam ibidem edificatam, et destruxerunt eos, et multos homines et res et bestias habuerunt,
Faventiam conducentes.
Dominus Maghinardus de Sosenana factus fuit potestas Faventie pro duobus mensibus,
scilicet pro mense novenbris et pro mense decenbris eiusdem anni.
Item, die primo mensis novenbris eiusdem anni, venerunt ad civitatem Faventie d. Guilielmus
ferariensis episcopus, apostolice sedis legatus, et cancellerius et legatus domini comitis
Rodulfi Romanorum regis electi in inperatorem, quorum oviam iverunt omnes milites
Faventie commorantes, cum equis copertis, armati cum sonaglis et tintinabulis et suprainsignis,
|
|