Caeterum si malefactores non poterunt inveniri,
damnum eidem mulieri illatum, ab universitate
ipsius terrae, in cujus territorio damnum
extitit perpetratum, secundum justitiam facies
emendari: ne ab hoc iteratam querelam ulterius
audiamus.
Cap. LXV.
Eidem, de procuratori ordinando, qui jura
Camerae tueatur, in causa quam sibi committit.
Porrecta G. et V. fidelium nostrorum culmini
nostro petitio continebat, quod cum
haberent, et habeant quasdam possessiones
et terras laboratorias in confinibus, quas
ipsi eorumque antiqui, per longissima tempora
tenuerunt et possederunt pacifice et quiete, nullam
ex fructibus eorundem partem Curiae nostrae,
vel alicujus personae privatae reddentes:
Pandulfus de Phasanella, proditor noster, et
tunc in ipsis partibus sacri Imperii vicarius generalis,
sub praetextu cujusdam inquisitionis,
dudum factae per procuratores nostri demanii,
autoritate propria et omissa justitia, quartam
partem fecit auferri, in ipsorum G. et V. grave
praejudicium et injuriam manifestam. Unde
cum pro parte ipsorum fuerit nostrae Celsitudini
supplicatum, ut eis providere super hoc de
nostrae clementiae gratia dignaremur: nos eorum
supplicationibus benignius inclinati, fidelitati
tuae mandamus, quatenus super praedictis
omnibus: prius tamen per te aliquo idoneo et
fideli procuratore statuto, qui Curiae nostrae
jura diligenter et fideliter tueatur: advocato