.CCCXCVIIII. Christi incarnationis anno, iubente imperatore Honorio,
sunt templa eversa et fracta simulacra. ex quo usque ad
annos ferme .XXX. tempore sancti Augustini, multum crevit Ecclesia.
 
Anno Domini .MCLXXVI., .VII decimo kalendas aprilis, domnus
archiepiscopus Magontinus magnum bellum cum exercitu regis
Siculi commisit, et eos fugavit in loco qui dicitur Carseoli, iuxta
castrum Cellense, et ex eis cepit ultra ducentos milites, et omnia
spolia eorum et eorum qui fugerunt obtinuit, insuper centum
quinquaginta militum spolia et equos … qui in Cellensi castro
erant optinuit.
Anno Domini .MCCXXIII., mense martio, die Martis, in festo
sancti Benedicti, pluit terra rubea quasi ex lateribus contrita, unde
maximus timor in Urbe et extra est exortus.
Anno Christi incarnationis .MLXXXVII. corpus beati Nicolai
Barum translatum est.
Anno .MXCV. stellę ceciderunt, et mox ultramontani ultra mare
catervatim ire cęperunt.
Anno .MXCVIIII. Beraldus effectus est abbas.
Anno .MCXI. Pascalis papa captus est ab Henrico imperatore.
Anno .MCXVIIII. Beraldus obiit, et Guido factus est abbas
usque ad annos sex.
.MCXXV. Adenulfus Farfensis factus est abbas.
Anno .MCXXX. contentio inter Innocentium papam et Petrum
Leonis qui dictus est Anacletus exorta est.
Anno .MCXXXIII. imperator Lotharius Romam veniens Lateranis
coronatus est. iterum anno .MCXXXVII. rediit, in Apuliam
pergens. victoriam in Deo donante percepit. in quo anno
Adenulfus abbas Farfensem abbatiam recepit.