Salimbene de Adam: Cronica

Pag 726


Qui eum intrare non permiserunt, sed iacuit in burgis dicte civitatis,
et sequenti die ivit Cremam cum sequacibus suis. Et
dominus archiepiscopus Mediolani uná cum omnibus de parte
intrinseca venerunt ad civitatem Mediolani et intraverunt in eam
cum magno gaudio et letitia. Et populus Mediolani ipsum dominum
archiepiscopum in dominum elegerunt; et de voluntate ipsius
domini elegerunt dominum Symonem capitaneum dicte civitatis
per unum annum et dominum Guilielmum de Pusterla potestatem
mercatorum et dominum Ricardum comitem de Langunscho potestatem
dicte civitatis. Et obiit papa Iohannes XXI in mense
Maii, et sedit in papatu menses VIII, dies I. Et eodem anno,
die Lune VII° intrante Iulio, obiit dominus Ugolinus de Foliano
et die sequenti fuit sepultus ad ecclesiam Sancti Spiritus de Regio.
Quod hoc anno fertilitas et abundantia magna fuit.
Et eodem anno unus sextarius fabe seminatus reddebat, in
usufructu qui exibat de dicto sextario, XVIII sextarios fabe et
XX et XXV. Ideo plus factum est quam in proverbio consuevit
dici, scilicet:
Fava de Çenaro, lo moço per lo staro.
Quod est dicere: quando faba in Ianuario seminatur, tantum
multiplicatur, quod pro sextario seminato modius excutitur inde.
Cognitio et traditio agricultorum ista est. Eodem anno et millesimo
exercitus Reginus ivit ad Besmantuam. Et venerunt illi
de Besmantua ad precepta potestatis et communis Regii in mense
Augusti.
De Guastalla, que capta fuit et recuperata.
Et in illo mense Guastalla sive terra Guastalle fuit capta ab
inimicis, sed incontinenti fuit recuperata per aliam partem, scilicet
Ecclesie, et mortui et capti fuerunt omnes qui ceperant eam.

Torna all'inizio