et divitem faciatis, et excluditis ydoneos et bonos viros, qui essent
utiles Ecclesie Dei, et prebendatis puerulos in cunabulis
decubantes. Ideo bene quidam truttannus de vobis dixit:
Accusative ad curiam si ceperis ire,
Proficis in nichilo, si pergis absque dativo.
Et iterum alius:
Curia Romana non curat ovem sine lana.
Presulis Albini seu martyris ossa Ruffini
Rome quisquis habet, vertere cuncta valet:
mus elephas fit, fasque nephas, de Sýmone Cephas.
Certe vos estis de quibus dixit Amos, V: Qui convertitis in abscinthium
iuditium et iustitiam in terra relinquitis. Vos estis qui separati
estis in diem malum et apropinquatis solio iniquitatis. Qui dormitis
in lectis eburneis et lascivitis in stratis vestris. Qui comeditis agnum
de grege et vitulos de medio armenti. Qui canitis ad vocem psalterii:
Sicut David putaverunt se habere vasa cantici, bibentes in fialis
vinum et optimo unguento delibuti, et nichil compatimini super
contritione loseph, Amos VI. Vos estis de quibus Ysaias propheta
dixit, V: Ve qui dicitis malum bonum et bonum malum, ponentes
tenebras lucem et lucem tenebras, ponentes amarum in dulce et dulce
in amarum. Ve qui sapientes estis in oculis vestris et coram vobismet
ipsis prudentes. Ve qui potentes estis ad bibendum vinum et viri
fortes ad miscendam ebrietatem. Ve qui iustificatis impium pro muneribus
et iustitiam iusti aufertis ab eo. Item bene completur in
vobis quod in figura vestri scribis et Phariseis imprecatus est Deus,
Mat. XXIII: Ve vobis, scribe et Pharisei, ypocrite, qui circuitis
mare et aridam ut faciatis unum proselitum; et cum fuerit factus,
facitis eum filium gehenne duplo quam vos. Item quod Ietro
docuit Moysen implere negligitis. Dixit enim, Exo. XVIII: Provide
de omni plebe viros potentes et timentes Deum, in quibus sit
veritas et qui oderint avariciam, et constitue ex eis tribunos et centuriones
et quinquagenarios et decanos, qui iudicent populum omni
tempore.
|
|