dixerat eis, Io. XV: Posui vos, ut eatis et fructum afferatis, et fructus
vester maneat. Vos autem non itis nisi ab hospitio vestro ad
consistorium pape, et ingredimini pompatice domum Israel cum
maxima comitiva. A consistorio pape transitis ad mensam et
comeditis et bibitis splendide; postea transitis ad lectum et
dormitis suaviter. Postmodum tota die estis ociosi in cameris
vestris et marcetis ignavia et delectamini cum caniculis et
anulis et nepotibus vestris et equis quadratis, et ut habeatis
familiam copiosam et bene indutam et nobilem apparatum et
prosperos de parentela vestra rumores. Talis est exercitatio vestra.
Nec vobis est cure quis peregrinus in vico iaceat, quis
egeat pane, quis induendus, quis visitandus, quis redimendus,
quis sepeliendus.
Certe totum mundum possetis convertere, si faceretis quod
Sapiens docet, Prover. VI: Discurre, festina, suscita amicum,
tuum, et iterum, Prover. XXIIII: Erue eos qui ducuntur ad mortem
et qui trahuntur ad interitum liberare ne cesses. Vobis plus
crederetur quam aliis sacerdotibus. Et de populo scriptum est:
Reminiscentur et convertentur ad Dominum universi fines terre.
Certe Dominus non se inclusit in una civitate cum discipulis suis,
sed misit eos binos ante faciem suam in omnem civitatem et locum
quo erat ipse venturus, sicut scribit beatus Lucas, X. Vos ergo
quare non sic? Forte dicturi estis: 'Quia mortem timemus seu
penuriam pati'. Sed audi quid de apostolis Apostolus scribit,
I ad Cor. IIII: Puto enim <quod> Deus nos apostolos novissimos
ostendit tamquam morti destinatos. Et infra: Usque in hanc horam
esurimus et sitimus et nudi sumus et cet. De Domino dicitur
quod circuibat totam Galileam docens in sinagogis eorum et predicans
Evangelium regni et sanans omnem langorem et omnem infirmitatem
in populo, Mat. IIII. Summus vero pontifex, qui papa
nominatur et episcopus et servus servorum Dei, ut lucrentur
denarios hi qui eum in carcere custodiunt, tota die et nocte moratur
inclusus, ut illud Ys. videatur impletum, XXXII: Erit
vir sicut qui absconditur a vento et celat se a tempestate».
Et addidit frater Ugo: «Si veritatem dico, quare non creditis
michi? Qui est ex Deo, verba Dei audit, Io. VIII. Nam ego quos
|
|