veruntamen, quorum conspectibus, quorumque
judiciis operis coepti primitiae possent
detentius deputari; ecce vobis potissime, velut
philosophiae praeclaris alumnis: de quorum
pectoribus promptuaria plena fluunt: libros
aliquos, quos curiosum studium translatorum
lingua non potuit fidelis instruere, consulte
providimus praesentandos vel destinandos.
Vos igitur viri, qui de cisternis
veteribus aquas novas prudenter educitis,
qui fluenta melliflua sitientibus labiis propinatis;
libros ipsos tanquam exennium amici Caesaris,
gratanter accipite; et ipsos antiquis philosophorum
operibus, qui vocis vestrae ministeriis
reviviscunt, quorumque nutritis
famam, dum dogmata sternitis sapienter
ut expedit, aggregantes eos in auditorio vestro,
in quo gratia virtutum fructificat, erroris rubigo
consumitur, et latentis scripturae varietas
aperitur, cum mittentis favore commoniti,
tum clari transmissi operis meritis
persuasi, ad communem utilitatem studentium
et evidentis famae nostrae praeconium,
publicetis.