Domino … legato conventus … monasterii, per archiepiscopum
Beneventanum.
Inclinant sacre nature federa, civilis ratio id exposcit, ut filii pro salute
paterna totis viribus intercedant, et si carnalis hoc sapit prosapia, multo fortius
spiritualis, cum incolumitas presidentis sit stabilitas subditorum. Cum
igitur venerabilis pater noster …, quem nobis in pastorem iuxta cor Domini
concessistis, nos paraverit doctrine verbo pariter et exemplo, collapsum
reparaverit monasterium, exhibens se circa nos et ipsum spiritualiter et temporaliter
multipliciter fructuosum, nunc anxietate quadam extorte necessitatis
graviter stimuletur, dum minaci quadam requisitione inducitur, ut fratrem
…, quem dignus carcer detinet vinculis alligatum, liberet a custodia
carcerali, cuius iniquitas processit ex adipe, cuius malitia venenosis radicibus
in ramos adeo pullulavit, ut in necem ipsius abbatis multorumque nostrum
nequiter conspirarit et ad finalis desolationis obprobrium totius monasterii
malignis conatibus aspirarit. Paternitatem vestram, tensis ad sydera palmis
affisisque genibus pavimento, totis affectibus humiliter deprecamur, quatenus
omnium nostri tanto periculo ipsiusque patris et domini necessitatibus
viriliter ac misericorditer obstatis, ut dictus iniquus, immo demoniacus,
debitis carceribus maceretur in communem salutem omnium et quietem, et
viridarium quod plantastis et plantula dignis rigationibus foveatur et in
fructus uberes intumescat, et nos, vestri assidui oratores ob beneficium tanti
patris, sub umbra vestre protectionis quiescamus in pace, preces obsecrationesque
pro vobis ad Deum, multiplicatis orationibus, inculcemus.
|
|