Item, die dominico XXIII mensis predicti, venit idem dominus comes ad civitatem Cesene,
ubi cum magno honore fuit receptus.
Item, die iovis XXVII dicti mensis octubris, predictus dominus comes fecit parlamentum
generale in civitate Cesene, ubi fuerunt anbaxiatores et sindici et procuratores omnium nobilium
et comitatuum provincie Romaniole; et, in ipso parlamento, fuit firmatum quod ipse dominus
comes posset accipere trecentum milites expensis provincie.
Item, die martis XV mensis novenbris, idem dominus comes equitavit Bretenorium.
Item, die dominico XX dicti mensis novenbris, supradictus dominus comes venit ad civitatem
Forlivii, ubi magnus honor fuit sibi factus.
Item, die mercurii XXIII dicti mensis novenbris, venit Castrocarium, ibique stetit multis
diebus.
Item, die dominico XI mensis decenbris, idem dominus comes separavit se de Castrocario,
ivitque Imolam, eundo per devia et non per stratam publicam; nec voluit intrare civitatem
Faventie.
Item, die XVIII dicti mensis decenbris, dominus Malatesta, cum parte sua de Arimino et
guarnimentis magnis, eques et pedes, undecunque congregatis in civitate Arimini, expulit violenter
aliam partem de ipsa civitate, occidendo et vulnerando multos, inter quos mortuus est
Ugolinus, qui dicebatur Cignatta, condam domini Parcitatis, et Mostacius et plures alii.
|
|