Pag 5

similiter in unoquoque die Martis fieri constituerunt. Ad
quod ipsi Mediolanenses ac Papienses, Placentini quoque
atque Cremonenses et Cremenses ac Pergamenses in omni
ebdomada venientes in Laudensium domibus hospitabantur;
unde ipsi Laudenses multum proficientes inde ditabantur.
Cum autem, karissime domine, Mediolanenses prospexerunt
ipsos Laudenses in rebus et personis valde multiplicari, maxime
condoluerunt; atque quorundam sapientum Mediolani communicato
consilio, ad diminutionem Laudensium et ut in
rebus atque personis decrescerent, iam dictum mercatum
de burgo Placentino, in quo prius fieri solitum fuerat, abstulerunt
et in quodam campo aperto, ubi nullus habitabat, ipsum
fieri constituerunt ac ipsos Laudenses ibi mercatum deinceps
facere compulerunt. Ob quam rem, sanctissime rex, ego et
quam plures homines de Laude ad inopiam devoluti fuimus.
Quapropter deprecor vos, clarissime rex, ac universos principes
vestros hic astantes, quatenus rogent vos, ut per litteras
vestras ac nuncium vestrum Mediolanensibus precipiatis,
quod predictum mercatum Laudensibus restituant ac in eum
locum, in quo fieri solitum fuerat, adhuc eis facere permittant."
Quod namque omnes principes annuentes unanimiter regi
persuaserunt, ut, sicut Albernardus dixerat, ita perficeret.
Rex itaque, qui pius fuerat et misericors, statim cancellarium