omnia fere oppida villasque depredavit combussitque ac
dissipavit; indeque etiam multam pecuniam extorsit.
Interea dominus Guido Cremensis, qui tunc papa fuerat
levatus et qui in locum domini Octaviani, qui ex tunc papa
Victor vocabatur, successerat et qui Guido Paschalis papa
vocabatur et tunc in civitate Viterbii morabatur et ab imperatore
et a multis archiepiscopis, abbatibus, prepositis aliisque
quam pluribus hominibus mundi tunc pro papa tenebatur,
imperatoris adventum diu expectans, cum sepe
et sepius iam imperatori mandaverat, quatenus Romam cum
suo exercitu veniens infra ecclesiam sancti Petri vi vel pacto
cum Romanis inito eum introduceret, sicut multociens ipse
promiserat, ac ibi ipsum manuteneret; videns ipsum imperatorem
pernimium et satis etiam ultra quam vellet iter morari,
statim suos nuntios quam plures ad imperatorem dirigens,
ut citius quam posset nulla dilatione habita Romam pergeret,
hostes debellaret et Rolandum cancellarium, qui tunc pro
papa in Roma et in quibusdam aliis multis partibus tenebatur
et qui etiam papa Alexander vocabatur et qui etiam tunc
in Roma morabatur, de Roma expelleret ac ipsum in Roma
poneret victoriamque de inimicis suis acquireret ac omnes
inimicos ipsius sue ditioni subiugaret; insuper etiam dicens
messem iam nunc fore albam ad metendum vineamque
maturam esse ad vindemiandum.
|
1
5
10
15
20
|