Pag 221

Si tua corda domat divinae mentis Apollo,
semper erunt faciles in tua vota dei.
Carmine saepe duces et magnos carmine reges
allexi et summum carmine saepe Iovem.
Adsis, quamque tibi servavimus accipe palmam:
gloria magna tibi, fama futura tibi est.
Me duce per Lybiem tua vita feretur et Indos
et duce me nomen ibit in alta tuum.
Haec tibi conveniunt, decus immortale iuventae,
cui vestit teneras aurea lana genas.
At iuvenis praestans animo et moderamine rerum
ipse eris armorum gloria honorque togae,
qualis in arma furens praestanti corpore Caesar
hostibus in mediis, tu quoque talis eris.
Inde, viri postquam matura adoleverit aetas,
aequabis reges caesareosque duces.
Ordine, iustitia, rerum gravitate Licurgum
equiperes: facilis regna futura reges
at Cato consiliis, grata pietate Metellus,
teque dabit nemo liberiore manu.
Te sene cessabunt odia et mala gaudia mentis.
te sene cana fides, te sene relligio,
te sene regna senis et rursus saecla redibunt
aurea, quaeque dabit semina pinguis humus.
Nulla peregrino veniet de littore puppis,
flumina lactis erunt, flumina mellis erunt.
Teque sene Ausonia tranquilla in pace quiescet,
et sene te sidus curret ab orbe novo.
Sic superi statuere et fati numina Parcae,
quae ducis Alfonsi fila severa regunt.
Vive deum soboles cum coniuge serus in annos,
quae pariat foetum qui ferat ore patrem.
Regna tibi Augusti, Pilii sint Nestoris anni
ingeniumque sacri quale Maronis erat.