Conradus etc. … comiti etc.
De corrupti parentis primi convitio tantam retinet hodie lesa posteritas
corruptelam, ut, facta iam quasi domestica cuilibet licentia delinquendi,
semper ad consensum nequitie prona sit humana conditio et per viciorum
lubricum cotidie corruat in excessum. Et sic homo, quem rationis participem
providentia divina creavit, a sue diffinitionis ordine quodammodo
discoherens, tante cupiditatis errore seducitur, ut voluntate secum et
ratione pugnantibus dum inter bonum malumve disiudicat, vix etiam
eligat quod discernit. Cuius effrenes motus et impetus nisi iustitie rigor
opprimeret et secularium coherceret auctoritas potestatum, suum pacis
dulcedo nomen amitteret et arbitrii communis abusio societatis humane
federa violaret. Cumque ad hoc specialiter leges et arma convenerint, nos,
qui ad subditorum nostrorum regimen superna dispositione vocati, hec et
illas debemus in subditis et possumus exercere, continua reddimur cordis
anxietate solliciti, qualiter utrorumque permixtis officiis et in gladio iuste
puniamus obnoxios et potenter in plena iustitia pacificos foveamus. Verum
cum per individuitatem persone simul et semel ubique presentialiter
nostra serenitas adesse non possit, ut noscant subditi longas regibus esse
manus, viris industriis, qui maiestatis nostre presentiam representent confidenter
committimus vices nostras. Cum igitur post salubrem et quietam
dispositionem regni nostri Sicilie, iam circa negotia Italie suscitare
|
|