3. Cuncte, que salso maris sunt in littore,
harenae mixte purpuratis conculis,
non meis possunt coaequari uiciis,
fateor, malis.
4. Doleo multis peccatorum iaculis,
confossus, arcu que Venus libidinis
intorsit lita spicula mortiferi
fellis abunda.
5. Effudit demon de faretra flammeas
sagittas, meum super uulnus uulnera
inflixit statim Cupido turpissima
fronte rugosa.
6. Factus sum uilis cuncta super uilia,
uenit latenter gladium Superbia,
cordis infixit mucronem sub medio
manu cruenta.
7. Genus serpentis adfuit Inuidia,
ueneni portans pocula pestiferi
dedit in sitim, mortis auctor extitit
sordida lues.
8. Horrida uultu faculam Discordia
igne succensam deferens sulphureo
medio meo posuit sub pectore,
coxit amare.
|
|