Pag 319

malignus. Et uidentibus omnibus expirauit, et audierunt uocem in
aere dicentem: " Quicumque istis fructibus et arboribus
propinquus accesserit, morte uelocissima morietur." Erant eciam
in ipso campo aues mitissime super eos uolantes, et cum aliquis
uellet eas tangere, continuo exibat ex eis ignis et eum crudeliter
incendebat etc.
Qualiter Alexander pugnauit cum draconibus et serpentibus et
leonibus et inuenit Basiliscum
Exinde amoto exercitu uenerunt ad quendam montem, qui
tante altitudinis erat, ut per otco dies continuos ipsius montis
summitatem uel cacumina petissent. Cum autem in summitate
montis existerent, uenit super eos maxima copia draconum et
serpentum et leonum, qui angustia afflixerunt eos. Tandem ab
eorum periculis euaserunt et descendentes de monte uenerunt
ad uallem obscuram, ita ut uix unus alium inspicere posset.
Erat autem in ipsa ualle condensa nebula, ut ipsorum manibus
palparetur. Erantque ibi innumerabiles arbores, quarum fructus
et folia saporosissimum gustum habebant; et ibi
riui clarissimi decurrebant. Per octo siquidem dies continuos
solem radiantem non uidebant. Completis uero diebus octo
peruenerunt ad radicem montis, sed tunc exercitus intantum
erat pergrauatus ex attraccione spissi aeris, quod fere omnes
suffocari uidebantur. Cumque autem superiora montis ascenderent,
inuenerunt aerem subtiliorem, et splendor diei illius
pocius elucescebat. Sicque impetendo summitatem montis
undecim diebus continuis laborarunt. Cum autem montis
cacumen ascendissent, uiderunt ex alia parte diem lucidissimum
et preclarum et descendentes de monte uenerunt ad planiciem
maximam, cuius terra erat nimium rubicunda. Erantque in ipsa
planicie arbores infinite, que ultra spacium cubiti non crescebant.
Quarum fructus et folia suauissima tamquam ficus erant, et
inueniebant riuulos aquarum plurimos, qui tamquam lac gerebant
aquam et corpora hominum ad modum lactis sine aliis
cibariis nutriebant. Et ambulantes in hac planicie centum sexaginta
diebus uenerunt ad altissima montana, quorum cacumina
celum tangere uidebantur. Erantque ipsi montes excelsi sicut
paries, ita ut nullus fieri posset ascensus ad cacumen. Inuenerunt
tamen duos transitus per medios montes diuisos. Vnus
transitus septemtrionalem plagam parabat. Alter uersus orientis
solsticium protendebat. Sed cum Alexander cogitaret, qualiter
isti montes diuisi sunt, non manu hominis, sed inundacione
diluuii indicauit illos esse decisos. Et dum per medium orientis
transitum intrauit, per dies septem ambulauit per illud artissimum
iter. Octauo uero die inuenerunt Basiliscum horribilem