VI. De oue et capra et iuuenca et leone.
Vt ratione pari fortune munera sumant,
Sumunt fedus ouis capra iuuenca leo.
Ceruus adest, ceruum rapiunt. Leo sic ait: «Heres
Prime partis ero: nam mihi primus honor.
Et mihi defendit partem uis prima secundam,
Et mihi dat maior tertia iura labor.
Et pars quarta meum, nisi sit mea, rumpet amorem».
Publica solus habet fortior, ima premens.
Ne fortem societ fragilis uult fabula presens:
Nam fragili fidus nesciet esse potens.
|
|