Omnis causa mali, fel dulce et dulce venenum
femina, quae lites secum tenebrosaque secum
argumenta gerit, lacrimas odiosaque portat
iurgia et incertas certo dat vulnere mortes.
Femina cum primum viciasset prima parentem
nostraque perpetuis posuisset corpora flammis,
una iter in caelum nobis tulit, una salutem
perpetuosque lares, cuius reverentia tantum
me tenet, ut vestros repetentes carmina morbos
praeteream taceamque omnes in lite libellos.
Ergo, ubi cum socio regalia cautus Ulixes
tecta simul subeunt, ducibus vicina pelasgis,
rege salutato, dextras iunxere vicissim
accepitque duces animo rex letus amico.
Hic est, Troia, tuis flammis inventus Achilles,
menibus exicium sacrisque penatibus ingens,
et via longa armis multisque petenda periclis
terrarum et pelagi; tanti tibi causa doloris
penarumque fuit tanteque occasio cladis
in castris cautus causisque disertus Ulixes.
Nam simul adduci sua post convivia natas,
rerum harum ignarus, Liconides iussit et omnis
ante oculos veniens patuit chorus: inclita proles
altior est Thetidis cunctis manifesta puellis,
quae non femineo posset fore credita vultu,
quamquam habitum veniens moremque tulisset eundem.
Non possunt aliena diu simulataque longis
|
125
130
135
140
145
150
|