Pag 149

venit et a Sergio papa baptizatus est Petrusque vocatus, qui in albis migravit ad Dominum.
Iustinianus imperium recuperans Leonem et Tiberium occidit, et quociens reuma de naso
tergebat, unum de Leonis fautoribus iugulari precipiebat. Gallicinum quoque patriarcham
Constantinopolitanum, qui ei contrarius fuerat, erutis oculis Romam misit; Cyrum abbatem,
qui eum in Ponto aluerat, patriarcham fecit. His temporibus Sergio pape successit Iohannes;
post quem alius Iohannes. Aput Longobardos Cunipertus, cum regnasset an[nis] XII, regnum
Liuperto filio dereliquit eique tutorem Asprandum instituit. Sed Ariperth puerum occidit,
tutorem fugavit, regnum invasit, Laudam et Bergamum cepit. Hic Ariperth hac illac
pergens, quid de se diceretur, et qualem iusticiam iudices facerent, privato habitu explorabat.
Hic Ariperth Alpes Cocias ecclesie Romane donavit vel restituit. Sed Gisulfus dux Beneventi
Campaniam invasit. His temporibus Benedictus Mediolanensis archiepiscopus Rome
causam habuit pro ecclesia Ticinensi, sed victus est. Iohanni pape successit Sinsinius; qui
instituit, ut in quinta feria misse cantentur; et Sinsinio Constantinus; quem Constantinum papam
Iustinianus augustus ad se Constantinopolim venire fecit, et in platea civitatis eius pedibus advolutus
veniam inpetravit, eumque honorifice suscepit et remisit et ecclesie privilegia renovavit.
Cuius Constantini temporibus duo Saxonum reges Romam orationis causa venere et ambo mortui
sunt. Demum Iustinianus exercitum in Pontum contra Philippicum misit; exercitus autem
Philippicum fecit imperatorem, qui Constantinopolim veniens Iustinianum occidit, qui hac secunda vice
regnaverat annis VI.
Anno Domini DCCXVII. Philippicus aput Constantinopolim regnavit an[no] I et men
[sibus] Vl; qui Cyrum ad monasterium suum remisit, Constantino pape litteras pravi dogmatis direxit,
quas papa respuit; et huius rei causa gesta VI synodorum in porticu Sancti Petri fecit pingi; statuitque
populus Romanus, ne carta vel effigies aut nomen imperatoris reciperetur heretici, nec pro
eo ad missarum sollemnia oratio fieret specialis. Hunc Philippicum Anastasius, qui et Arthemius
dictus est, oculis et regno privavit.
Anno Domini DCCXVIII. Anastasius aput Constantinopolim regnavit an[nis] III;
qui Constantino pape litteras direxit, quibus se fautorem catholice fidei declaravit. Hic classem contra
Saracenos in Alexandriam misit, sed Urbem reversus exercitus Theodoxium orthodoxum imperatorem
elegit et coactum imperii solio confirmavit. Aput Longobardos Ariperto, cum regnasset
an[nis] XII et fugeret a facie hostium suorum, in Ticino flumine suffocato regnavit Asprandus
men[sibus] III. Cui successit Liutprandus filius eius. His temporibus beatus claruit
Leonardus.
Anno Domini DCCXXI. Theodosius aput Constantinopolim regnavit an[no] I; qui
Anastasium fecit ordinari presbiterum. Hic gesta VI synodorum fecit repingi, que a
Philippico deleta fuerant. His temporibus aput Romam Tiberis inundavit, ut ad portam
Sancti Petri usque ad pontem Molvum aque descendentes se coniungerent. Mansit hec inundatio
VII diebus et octavo crebris letaniis peractis decrevit. Hisque temporibus Constantino
pape successit Gregorius, qui Germanos per Bonifatium episcopum convertit ad Christum, et
statuit ieiunandum in quinta feria quadragesime, et firmavit missas per anni circuitum