Petri Cantinelli: Chronicon

30


Romaniole, et fecit ibidem legi sua ordinamenta, que volebat per totam provinciam
generaliter observari
].
Postea vero venit dictus dominus Bertuldus Forlivium, et venit Faventiam et Imolam, et
ibidem stetit pluribus diebus, et factus fuit tractatus pacis hominum civitatis Imole, scilicet
inter intrinsecos et extrinsecos, et etiam inter Faventinos; et dictus dominus Bertuldus accepit
obsides ab utraque parte Imolensium, quos duxit ad civitatem Forlivii. Et, die veneris XXVII
mensis ianuarii, pars Mendullorum de Imola, que morabatur Faventie, intravit civitatem Imole
cum magno gaudio et triunpho.
Item, die lune penultimo mensis ianuarii anni domini M.CC.LXXIX, indictione VII,
dominus legatus predictus venit ad civitatem Faventie, et honorifice fuit receptus. Die
martis sequenti, illi de parte Manfredorum, qui erant extra Faventiam, redierunt in civitatem
Faventie, et, cum magno gaudio, fuerunt recepti ab illis de parte Acharixiorum. Item
die mercurii primo februarii, dictus dominus legatus et dominus Bertoldus, qui etiam venit
Faventiam dicto die martis ultimo ianuarii, fecerunt arengum in podio sancti Petri, et ibidem
anbe partes de civitate Faventie fuerunt, et L ex qualibet parte fecerunt pacem ad invicem,
osculo pacis interveniente. Et dominus legatus predictus tulit sententiam suam, et mandavit
partibus ut pacem predictam observarent, sub pena X.m marcharum argenti.
Die vero iovis II februarii, dictus dominus legatus fecit maximum convivium in pallacio
Faventie, ubi fuerunt maiores utriusque partis de Faventia, et multi, tam clerici quam laici,
et dominus comes Guido de Montefeltro et dominus comes Dadeus Boncontis et multi alii
magnates.
Eodem anno, die dominica ultima mensis aprilis, circa horam vesperarum, fuit magnus
terremotus. In nocte vero sequenti, adveniente die lune kalendarum madii, quasi circa horam
medie noctis, fuerunt terremotus magni, et specialiter unus maximus fuit, propter quod
gentes plurimum timuerunt; nam, ex forcia eius, multa castra in montanis corruerunt, et conquassata
sunt, et multe gentes mortue sunt sub castris et muris castrorum, que corruerunt.
Et tunc mortuus est Banbus filius Bonifacii de Sosenana, in Castiglonclo, cum pluribus aliis,
qui erant cum eo. Similiter et filii fratris Guarnerii filii domini comitis Glaçesii de Castrocario,
qui erant in castro de Fantella, cum matre ipsorum et tota eorum familia, mortui
sunt propter conquassationem turris et castri predicti. Et multe alie gentes infinite mortue
sunt, dicta occasione, in multis partibus mundi, propter domos et edificia, que corruerunt;
et plurime ecclesie similiter destructe sunt propter fortiam dicti terremotus.
Eodem anno factus est potestas civitatis Bononie dominus Bertoldus de filiis Ursi romanus
civis comes Romaniole, per sententiam latam a domino Nicholao papa tercio. Et intravit civitatem
Bononie in die festi beati apostoli Petri, de mense iunii, ubi, cum magno triunpho et
honore, fuit receptus.
Eodem anno facta fuit pax in civitate Bononie, in plena contione et predicatione, apud
ecclesiam beati Dominici, inter sindicum totius partis Geremiorum, qui dominabantur civitatem,

Torna all'inizio