Galla quidem, Romanorum nobilis patricia,
Condidit Mediolani celsa hedificia,
Ubi est nostri levitę celebris noticia.
Numquid est in toto mundo aula tam mirabilis
Porphireticis exstructa cum aureis laminis,
Ut Laurentii levitę et beati martyris?
Theodosius Vercellis construxit basilicam,
Quam fecit centum columnis diversis mirificam;
O Eusebi, huic precare patriam glorificam!
Karolus condidit multa dei tabernacula
Ideoque caret modo omni carnis macula;
Paradisi nunc obumbrant Karolum umbracula.
In Papia rex Liprandus ad decus clavigeri
Fecit templum, quod appellant gentes cęli aurei;
Quod est regis ad salutem animę vel corporis.
Adelegida, quę nunc est inter choros ovium,
Quę consistunt ante matris Iesu Christi solium,
In honore Salvatoris condidit coenobium.
|
|