accepto <alio> pro eodem cambio, volenti ei contradidit.
Siquidem castrum ipsum plurimum obtabat, eo quod in arduo
posito monte, omni pene Apulie supereminebat; quam sibi
per illud ex maxima parte posset tueri.
52
Troia itaque debilitata, rex illinc recedens dum Melphiam
pergeret, in ipso itinere civitatis itidem Asculensis superbiam
deposuit. Nam illam omnino eversam plano in campo manere
instituit, in tres videlicet dispertitam casales. Cum comes itaque
inadverteret quod Rex tunc super se venire non esset intentus,
set apud Melfiam demoraretur, cum suo exercitu ad propria
recessit.
53
Verum Rex Melfia discedens Gravinam urbem petiit, ibique
aliquantulum commoratus, Salernum post remeavit, gaudens et
exultans quod, tota Apulia funditus devicta, solum sibi Beneventum
ac princeps Robertus comesque Ranulphus atque Neapolis
ad expugnandum supererant. Quam ob rem Rex ipse militibus
circa Beneventum Capuamque constitutis, diligenter precepit
ut quousque a Sicilia cum hostili manu reverteretur, eas ipsi de
foris incessanter depredari non desisterent. Post hec autem,
antequam hiemis importunitas subintraret, navigio transvectus
Siciliam repetit.
54
Cumque illic ad tempus usque progrediendum in hostem
moratus fuisset, navali rursus tramite Salernum advenit; qui
innumeram undique confluentem armatorum manum ad se accitam
prope Apitium oppidum congregari iussit. Cum ergo ipse
Beneventum obsessurus putaretur, repente moto expeditione