Aggrediuntur eum precipitantque solo,
Dilacerant vestes, dentes in corpore figunt:
Fuste caret cum quo pellere possit eos.
Mox animum capiens surgit lapidesque requirit,
Quos reperire nequit nocte nocente sibi.
Ante suos vultus opponens brachia, cancri
More retrograditur, ora pavendo canum.
Forte via media, qua pergit, fossa patebat
In qua retrogradus Fulco repente ruit;
Sordenti ceno fuerat pars ima repleta:
Est ibi crure tenus fixus adusque diem.
Vociferans clamabat opem, sed vociferantem
Non sinit audiri garrula turba canum.
Per totam noctem medio fecisque lutique
Infelix iacuit, sic sua fata gemens:
"Me miserum! Contra Dominum que crimina feci,
Mitteret ut subito tanta flagella michi?
Ecce dies michi preteritus, potuque ciboque
Dempto, cum multa perditione fuit!
Insano similis percussi factus amicum,
|
|