princeps et Anfusus Capuanorum princeps et Henricus mortui sunt. Nouissime autem Roggerius
dux Apulie, primogenitus eius, mortuus est anno Dominice incarnationis MCLIX
indictione XII uir quidem speciosus et miles strenuus, pius benignus misericors et a suo
populo multum dilectus. Rex autem Roggerius tot flagellis aflictus constanti animo pii patris
flagella sustinuit, et sic se medium inter prospera et adversa exhibuit, ut nec eum prospera
plus iusto erigerent nec aduersa penitus inclinarent. Nam licet multiplici dolorum
stimulo perurgeretur in animo, foris tamen consolatoriam speciem et doloris temperantiam
pretendebat in uultu, et in sua consolatione regno suo consolationem tribuit et inimicis suis
insultandi materiam denegauit. Et quia solum Willelmum Capuanorum principem habebat
superstitem, ueritus ne eundem conditione humane fragilitatis ammitteret, Sibiliam sororem
ducis Burgundie duxit uxorem, que non multo post Salerni mortua est, et apud Caveam est
sepulta. Tertio Beatricem filiam comitis de Reteste in uxorem accepit, de qua filiam habuit,
quam Constantiam appellauit. Biennio autem antequam moreretur, Willelmum filium
suum Capuanorum principem in regem Sicilie fecit inungi et secum iussit pariter conregnare.
Interea Eugenius papa apud Tusculanum aliquanto tempore demoratus, pacem cum
|
|