Vices suas non observant celum, terra, maria;
Helementa vitę nostrę quondam salutaria,
Facientibus peccatis apparent contraria.
In incertum iactat gressum vana gens mortalium
Indisciplinate currens more animalium;
Similis quidem videtur choris Bachanalium.
Civitates sunt divisę in multis erroribus;
Harum cives transformantur in hyrcos ex ovibus.
Hec mutatio ministrat helegos pastoribus.
Ab inferno prodierunt noviter heretici,
Patarini, Buziani nec non et Prandellici
Non curantes, quid loquantur utpote frenetici.
Araldinus Patariam primitus edocuit,
Buzifilius Buziam consequenter vomuit,
Seque esse antichristum Prandellus innotuit.
Nimis sunt insipientes, qui his volunt credere.
Araldellus lingua grossa catus tantum frendere
Ad euphoniam linguę nequivit ascendere.
Saonensis Buzianus est quidam homuntio,
Ventre lato, crure curto, par podicis nuntio;
Tale monstrum non creavit sexuum coniunctio.
|
|