sabbatum minime dicatur. Dalmatica et tunica ad missam usque ad
Coenam Domini minime induantur, loco earum casulis ministri uestiantur.
Ipso die adipem comedant, deinceps usque ad Pasca abstineant.
FERIA QUARTA IN CAPITE IEIUNII
Capitula Conuertimini ad me et caetera quae sequuntur. Post Sextam
reuertantur in claustrum locuturi; cum tempus fuerit pulsetur unum de
mediocribus signis, quo pulsato statim silentium fiat in claustro. Discalcient
se et pergant abluere manus et sic uadant in aecclesiam sine ulla
mora faciantque orationem unam communiter. Qua facta pulsentur duo
signa inchoante infante Exsurge domine ; psalmus Deus auribus nostris ;
his expletis dicat sacerdos Ostende nobis domine ; sequatur Kyrieleison .
Pater noster. Et ne nos ; psalmus Deus misereatur nostri ; capitulum Et ueniant
super nos ; collecta pro peccatis Exaudi quaesumus domine supplicum preces .
Post haec benedicat sacerdos cineres stolam tantum habens et sparsa
desuper aqua benedicta mittat cineres super capita fratrum dicendo
Memento quia cinis es et in cinerem reuerteris . Interim cantetur antiphona
Immutemus cum uersibus psalmi Deus misereatur nostri uno aut pluribus
si opus fuerit. Hoc facto exeant ad processionem cantantes has antiphonas
Exaudi nos. Iuxta uestibulum . Quae duae antiphonae, id est,
Exaudi nos et Iuxta uestibulum ad omnes processiones Quadragesimae
quae quarta et sexta feria fiunt eodem ordine cantentur. Percantatis
antiphonis incipiant duo infantes letaniam. Hoc ordine agatur processio
sexta feria, quae sequitur Caput Ieiunii, et quarta et sexta feria per totam
Quadragesimam usque ad quartam feriam ante Pascalem festiuitatem,
nisi festiuitas duodecim lectionum in ipsis feriis euenerit. Notandum quia
si in Capite Ieiunii festiuitas duodecim lectionum euenerit, non celebratur
ipsa die set differtur in crastinum. |
|