Cap. IX.
Cuidam comiti, ut paret se ad procedendum cum
ipso contra inimicos.
Plenam dant nobis praeterita fiduciam de
futuris, ut, sicut te hactenus ex fide
praecipuum, et industria specialem semper
invenimus, ad beneplacita nostra paratum,
sic nativa tuae devotionis excrescente constantia,
quaecunque nostrum et Imperii honorem
respiciunt, fideliter et sollicite promptis affectibus
exequaris. Cum igitur praesentium negotiorum
et temporum qualitas exigat, fideles
quoslibet in nostris servitiis multo virilius solito
vires et animos exercere, devotionem tuam
requirimus, et hortamur, attente mandantes,
quatenus si unquam te dudum obsequiosum
nobis et utilem praebuisti, fructuosiorem de
caetero ex opere te praesentes, ut fide tua per
fructuum efficacia succrescente, erga te muninficentiae
nostrae dexteram liberalius extendamus.
Inter alias siquidem cogitationes nostri
propositi, stabili tenacitate firmavimus,
ad partes in manu forti et brachio extenso
personaliter nos conferre, ut fidelium nostrorum,
qui pro fidei nostrae nomine, et felici
statu Imperii personarum pericula et rerum
dispendia non vitarunt, amplis praemiorum
retributionibus compensemus et effrenem superbiam
nostrorum rebellium, qui nunc de
absentia nostra forsitan gloriantur, potentiae