10. Ipsius enim sumus . Ratio cur ex operibus suis
nemini sit gloriandum. Quasi diceret: ipse fecit et
creavit nos in fide Jesu Christi, et in operibus bonis
quae per gratiam suam praeparavit nobis. Potest et
factura ablativus esse, ut sit sensus: operatio ipsius
est, quod creati sumus in fide Jesu Christi, etc.
11. Propter quod memores . Quia, inquit, fidem, et
bona opera Deus dedit vobis, memores estote verborum
Dei; malorum, in quibus fuistis, ut pro collatis
beneficiis majorem Deo gratiam rependatis.
12. AMBROS. Qui dicebamini . Quod dicit in carne
adjici illi debet, qui dicimini non in illo dicto, quo
gentes dixit, ut sit sensus in carne praeputiatos debere
dici.
13. LANFR. Hospites testamentorum . Hospites
erant gentes in eos qui testamenta habebant, vel
quia ad tempus more hospitum veniebant et recedebant;
vel quia si qui eorum ad Judaicum ritum
convertebantur advenae et proselyti vocabantur.
14. AMBROS. Medium parietem . Inimicitiam et separationem
quae ex circumcisione fiebat, cum omni
lege fecit cessare. Nam post resurrectionem, immortalitatem
nobis praestans destruxit haec. In immortali
etenim natura circumcisio nequaquam
poterit celebrari.
15. LANFR. In carne sua . In carne sua vel assumpta,
vel crucifixa, solvit Christus legales observationes,
quas parietem et inimicam [ f ., inimicitiam]
vocat inter Judaeos et gentes; lex enim non
erat data, nisi usque ad adventum Christi.
16. Reconciliet ambos , etc. Reprimit Judaeos, dicens
|
|