9. De civibus ad cives, ut restituant quosdam boves sublatos cum preda
In preda bestiarum, quas nudiustercius in pertinenciis talis ville
subripuisse vos contigit, duorum parium nostrorum boum, qui tunc cum
aliis pascebantur in pascuis, abstulistis. Unde, cum non sit iuris cum
sontibus damnare insontes, nec licet nec expedit quod nos et nostri,
qui vobis amicamur perpetue, in vestrorum inimicorum numero proscribamur.
Quare dileccionem vestram precibus exoramus attencius
quatenus dictos boves talibus signatos insigniis ex gracia relaxantes,
latore presencium remittatis.
10. Responsiva, quod mittuntur per nuncium
Suadet nobis vestre clare benivolencie nexus, ut in vestris honoribus
et commodis agamus semper similiter ut in nostris. Eos itaque
boves per vos repetitos vobis duximus per presentis cedule gerulum
remittendos, rogantes si qua vobis gratuita possumus, tamquam obtenturi
petita vobis, fiducialiter nobis inponatis.
11. Invitant domicelli alios domicellos ad suam curiam
Eorum, quibus vinculo dileccionis adiungimur, nobis persuadente
consilio, in proximo paschale pentecostes firma disposicione decrevimus,
dum veniat Dei summe nutu clemencie, extolli ad cinguli militaris
honorem. Cupientes igitur ad nostram curiam vestram habere presenciam,
caram vestram nobilitatem precamur quatenus vobis placeat
quod tunc temporis sibi senciat proximam corporalis presencia nostra
vestram.
12. Responsiva, quod bene venient
Grandis affuit nostro cordi iocunditas, vestrum intellecto
per apicem, quod presenti desideratis in tempore militari cingulo decorari.
Ad quod vestra sinceritas recipiat sub brevitate responsum, quod
vestram curiam advenire proponimus, nisi evidens, quod absit, obstaculum
conceptum in corde nostro propositum inpediret.
13. Recommendat miles militi histrionem remunerandum
Iohannes, presencium lator, cuius est moris curias visitare nobilium,
nostram visitavit ad presens et honorifice se gessit. De vobis quem
reale premium pro suorum gestuum varietate petentem vestre duximus
providencie commendandum.
14. Mittit nobilis nobili, ut mittat palefridum
Convitatus ad curiam talium qui debent accingi cingulum militare,
presenter cupiens decenti fulcimento fulciri, ut possim eis gratuitos
|
|