ipsam puram et nudam veritatem, processus videlicet,
quos contra nos summi pontifices hactenus
habuerunt, vestro conspectui praesentamus. Ad
cujus inspectionem plenariam et attentam de
tot temporibus et diebus vestris negotiis disputatis,
unum sufficiens tempus et diem nobis
adfectio vestra concedat: quod si licuerit diligenter
attendere regia consilia, recte considerent,
si fuerit in praedecessoribus nostris rectitudinis
zelus, si nobis tot et tantis iniuriis
lacessitis justa debuerit, aut debeat defensio denegari.
Si demum Christi vicarius, Christi vices
impleverit: et si Petri successores, ejus
imitentur exemplum, considerent etiam
quo iure censeri debeat, validus processus
hujusmodi contra nos habitus: vel quo nomine
nuncupari, si dici sententia liceat, quam
judex incompetens promulgavit. Nam etsi
nos nostrae catholicae fidei debito suggerente,
manifestissime fateamur, collatam a domino
sacrosanctae Romanae sedis antistite, plenariam
in spiritualibus potestatem, ut quantumcunque,
quod absit, sit ille peccator, quod in terra ligaverit,
sit ligatum in coelis, et quod solverit,
sit solutum: nusquam tamen legitur divina
vel humana lege sibi concessum, quod transferre
pro libito possit Imperium, aut de puniendis
temporaliter in privatione regnorum regibus
et principibus judicare. Nam licet ad eum
de iure et more maiorum consecratio nostra
pertineat, non magis ad eum depositio seu remotio