intrinseci cum extrinsecis Brixiensibus et fecerunt pacem cum
Mediolanensibus et Bergamensibus in mense Februarii.
De obsidione Montis Vallarii.
De destructione Montis Vallarii.
Et eodem anno Mutinenses extrinseci occupaverunt castrum
Montis Vallarii, quod quidam nobilis de comitatu Mutinensium,
scilicet dominus Ugolinus de Guillia, factus de amico et fideli Mutinensium
intrinsecorum, scilicet Aigonum, qui parti Ecclesie
Romane favebant, repente inimicus et proditor (et illis factus
est rebellis, qui ipsum multipliciter honorabant), tradidit eisdem,
scilicet illis de Gorçano et aliis de parte sua. Qui dictum castrum
tenentes episcopatum civitatis Mutine multipliciter flagellabant.
Quam ob rem prefati Mutinenses intrinseci uná cum Reginorum militia
et magna populi quantitate et aliquibus Parmensibus accesserunt
ad obsidionem dicti castri viriliter et potenter. Ibique per
totum mensem Iunii permanentes, tanta fuit in dicto castro sitis
et fames propter hominum et animalium multitudinem, que ibi
vivere non poterant, et tantus erat ibi fetor, quod dictum castrum,
dum ipsius palancatum die tertio Iulii per violentiam perdiderunt,
iam ad extrema deducti, habito personarum affidhamento, reliquerunt
Iulii die quarto. Tunc prefatus proditor Ugolinus de
Guillia, dum infirmus ad mortem de dicto castro portaretur, populari
ire et voci suppositus, in campo fuit crudeli morte peremptus;
et dictum castrum destructum fuit in totum.
De pace Reginorum, quam inter se fecerunt, scilicet Robertorum et illorum
de Sesso.
Et eo anno, die tertio Septembris, facta fuit pax inter partem
extrinsecam illorum de Sesso et partem intrinsecam Robertorum.
Et fuit utilis potestas dominus Bonacursus Bellençonum de Florentia
pro pauperibus in civitate Regina et malus pro nobilibus.
|
|