Quem retinens, dixit: "Te nimis oro, mane!
Ut mecum comedas pro magno munere posco,
Magna dedisse michi premia visus eris".
"Iam manducavi, ventri satis est benefactum:
Omne quod est nimium tedia sepe movet;
Quas agimus cunctis modus est in rebus habendus,
Ius rectumque perit deficiente modo;
Si dape vel potu stomachus quandoque gravetur
Plus iusto, vomitum fauce patente parit;
Denique plus iusto pondus qui ferre laborat,
Aut sub fasce ruet, reiciet vel onus.
Ad mensam redeas, michi stat bona vestra voluntas;
Profecto veniam, te comedente, cito".
<Fulco >
Ad mensam rediens assatas ore ferentem
Murilegum carnes sparsaque vina videt:
Vociferat carnes quas fert ut predo relinquat,
Profuit ast illi vociferare nichil.
|
|