Cap. LXV.
Eisdem, super ratiociniis ab officialibus exigendis
vel audiendis.
Ad expeditionem celerem nostrorum fidelium,
ratiocinia ponentium coram nobis,
ut fisci nostri profectus in eis facilius
et celerius procuretur, utiliter et necessario
providimus statuendum, ut omnes simili
distinctione temporis non attenta super recipiendis
ratiociniis instanter et efficaciter intendatis;
ut ibi sit multa salus, ubi multa consilia,
ne aliquid inexpeditum pertranseat, seu remaneat
imperfectum, ex multarum perspicacia
mentium, et intuitu quam plurium oculorum.
Quocirca fidelitati vestrae firmiter et districte
praecipiendo mandamus, quatenus non obstante
quod quosdam ex vobis pridem mandatum
nostrum ad audiendum ratiocinia certi et determinati
temporis spatium deputaverit, simul
amodo et communiter incitandis ab omnibus
officialibus ratiocinia posituris, et eorum ratiociniis,
tam novis quam veteribus audiendis,
prout melius poteritis et salubrius intendatis,
super eorum decisione celeri, quantumcunque
poteritis solicitudinem impensuri. Caeterum
post collationem in talibus habitam, unusquisque
vestrum, cum uno notario per se, et
singuli sigillatim eadem ratiocinia plene discutiant
ut ex hoc celerior expeditio procuretur.
Super qua si dubitatio ulla emersa, ad alterutrum
recurret, et communiter conferatur, secundum
quod inter omnes convenerit terminando.