Pag 135

filiam, quam adduxerat, Transmundo filio [dedit uxorem]; unde natus est Hildericus rex.
Marcianus autem imperator Orientis aput Constantinopolim moritur. Temporibus Martiani
et Valentiniani aput Calcedoniam concilium celebratur. In quo Eutices et Dioscorus et
supradicta synodus Ephesina Marciano auctore dampnantur. Alexandrinus episcopus VIII.
Kalendas Maias et Leo papa XV. Kalendas Maias pascha Domini celebrarunt. Extant igitur
epistole pape Leonis ad principem destinate de observatione pascae. Pelagiani Britannorum
temptabant fidem evertere, qui a Gallorum episcopis ad defensionem fidei auxilium petiverunt.
Mittuntur itaque Germanus Altissiodorensis et Lupus Trecasonus episcopi, viri
sanctissimi, qui non minus miraculis quam verbis eos ad conversionem sane fidei retraxerunt.
Adhuc ibidem sanctissimis manentibus episcopis valida Saxonum et Pictorum manus Britaniam
invadit. Britones arma capiunt; sanctus Germanus cum eis pergit ad prelium. Cumque velut
dux belli ante consertam aciem staret, monuit exercitum, ut eo clamante clamaret. Magna
itaque voce clamavit “Alleluia”, exercitus una voce similiter “Alleluia”. Pavor hostes invadit;
fugiunt et ad propria revertuntur. Paulinus Nolanus episcopus quicquid habere potuit in
redemptionem captivorum, quos Gensericus abduxerat, expendit. Novissime, cum nichil
haberet, se ipsum pro cuiusdam vidue filio vice vicaria in servitium dedit; cuius sanctitas cum
aput barbaros nota fuisset, demum cum omnibus suis civibus ad urbem propriam remeavit. Marinus
autem Rome martirio coronatur.
Anno Domini CCCCLVIIII. Leo aput Constantinopolim regnavit annis XV. Aput Romam
vero quidam Avitus imperator efficitur. Quo defuncto Maioranus aput Ravennam invadit
imperium. Quo iuxta Terraconam occiso quidam Severus aput Ravennam eligitur.
Cuius tempore Iogor rex Alanorum in Ytaliam venit, sed a Ricimere preside Ligurie
superatus et iuxta Pergamum occisus est. Severo successit Antemius. Cuius temporibus
Gensericus rediens in Ytaliam navali certamine superatus est. Servandus prefectus
Galliarum et Romanus patricius aspirantes imperium capti sunt. Ricimer, qui Mediolani
morabatur, insidias paravit Antemio; et licet sanctitate pollens Epyphanius episcopus
Tycinensis pacem conposuisset, Ricimer tamen fedus violans Urbem invadit. Roma dividitur;
pars illum, pars sequitur istum. Bilimer rector Galliarum veniens in auxilium
Antemii a Ricymere superatur et occiditur. Denique Richimer Urbem invasit et Antemium
trucidavit; at post mensem tercium languoribus cruciatus interiit. Quidam quoque Olibrius regiam